Biographie Rockseck ab 2022
…tja, leider hei mir im 2021 ä Veränderig vo dr Zämesetzig gha… d´Bedürfniss vo jedem Einzelne hei sich veränderet… u drum het dr Gründer vo dere Bänd d`Rock-Seck verlah… Merci Tinu für die vergangene Jahr 😊 !
Nach däm Usträte vo Tinu hei mir ä nöie Drummer müesse sueche u drby dr Rönu chönne „nacherekrutiere“. Nach äs paar wenige Probe het är üses bestehende Repertoire im Griff gha… u scho nacheme churze Zytli speter si mir fürne Uftritt ar OGA 2022 z´Langnou buechet worde.
So hei mir äs ehrgizigs Ziu gha, das mir bis derthäre wider sattufescht gnue si gsi für ds Publikum, wo üs dert erwartet hett.
U itz si mir gäng wider chli dranne, äs paar nöii Stück iiz´üebe oder a de bestehende dranne z´fiele…
Natürlech si mir o i dr abg´änderete Zämesetzig für Uftritte z´ha…!
Rockegi Grüess
Hausi Loosli, Hausi Kohler, Hansüelu Grunder, Steffu Rüegsegger, Wäutu Hutmacher, Rönu Graf
Biographie Rockseck 2015-2021
Im Jahr 2004 hei sech Hausi Loosli u Tinu Zaugg im Quartier Famoos z Langnou glehrt kenne.
Im Musig Fachgeschäft Pat's Instrumänteshop, het der Gschäftsinhaber vomene super Pianist verzeut, wo i däm beseite Quartier wohni u chürzlech äs Piano kouft heig…….äbe Loosli Hausi. Euphorisch hei die zwe zäme afa Musig mache u d Basis gleit für das, wo später no aues söu cho. Rockig, popig, Boogie Woogie u no viu meh. A chlinere Aläss, hei Hausi u Tinu Lüt chönne ä Fröid mache.
Im Jahr 2015 isch d Band schliesslich erwiteret worde. Mit Kohler Hausi vo Langnou, isch aus erschti Person dr Sänger derzue gschtosse. Ä sehr erfahrene Ma mit äre tolle Stimm. Huetmacher Wäutu vo Louperswil isch de afe einisch cho schnuppere, bevor är üs aus Rhythmusgitarrischt het zuegseit. U de Grunder Hansüelu, äbefaus us Louperswil, ä Virtuosä uf dr Gitarre, het schliesslech o zuegseit. U singe cha är de o no grad sehr guet. Äs grosses Glück isches gsi, dass mir die Kollege innerhalb vo wenige Monet hei dörfe kennelehre u begrüesse. D' Suechi nacheme Bässeler het sech de chli aus grösseri Herusforderig usegstellt.
Schlussändlech hei mir ir Person vom Steffu Rüegsegger ä Bassischt gfunge wo guet zu üs passt u mit sine schnäue Basslöuf mängem Stück ds I - Tüpfli ufsetzt. Der Steffu wohnt ds Langnou.
So simer zämecho u hei nach intensive Probe u Diskussione, am 21. Juni 2017 ds Signou bim Bahnhof ds erschte Konzärt gäh. Ir Zwüschezyt heimer viel zäme erläbt u üses Repertoire isch kontinuierlech gwachse.
Mir spiele vor allem Rock Coverversione mit eigetem Arrangement, hei aber o agfange eigeti Stück ds schribe. Eifach aus wo rocket u Fröid macht.
Für ds üebe träffe mir üs regelmässig ds Louperswil bi Huetmachers, wo mir ufene super Infrastruktur chöi zrügg griffe.
Mir hoffe, dass mir mit üsere Musig o öich bi Glägeheit chöi ä Fröid mache.
Rockegi Grüess
Hausi Loosli, Hausi Kohler, Hansüelu Grunder, Steffu Rüegsegger, Wäutu Huetmacher, Tinu Zaugg
